رنج اعزاز وفا معنی دے

رنج اعزاز وفا معنی دے
اے مرے کرب و بلا معنی دے
عمر بھر کا یہ بھٹکنا کیا ہے
بے در و بام دعا معنی دے
اپنے ادراک کا ابہام سمجھ
باطن حق سے صدا معنی دے
گنبد درد میں یوں سر نہ پٹخ
لب پہن شور مٹا معنی دے
بے بصارت بے بصیرت ہوں میں
خود ہی دیوار گرا معنی دے
پردہ ہائے سرِ ہر تارِ نفس
ایک اک کر کے اٹھا معنی دے
یا تو خود بول مری حکمت میں
یا کبھی کھل کے ذرا معنی دے
ضبط بے ربط کو مضبوط نہ کر
مستقل طرزِ ریا معنی دے
کھول بھی بندِ قبائے اسرر
دیدہِ شوقِ خدا معنی دے
حرفِ حق بول سرِ شہرِ یزید
رہ نہ بے جرم و خطا معنی دے
فرحت عباس شاہ