گمان دارم، که تو در من پدیدی

گمان دارم، که تو در من پدیدی
مگر همچون منی دیگر ندیدی؟!
سدایم را میان پردهایی،
شنیدی ، عاقبت، آری شنیدی.
به امداد من رهریز و سرگم،
خوشا آخر به امدادی رسیدی.
از این گلزار رنگارنگ بیدر،
گل ایمان ما را نیک چیدی.
چه بی‌رحمی، که من از تو بریدم ،
تو هم از من به آسانی بریدی.
من بی تو ندیدم روزگاری،
رحیما، بر شب ما کی دمیدی؟
از این بازار کالای خیانت،
خریدی هستی ما را، خریدی.
زدی آتش به پیراهن ز غیرت،
‌فکندی، پاره کردی بردریدی.
سرم در سجدة شکرانة توست،
تو عطر توبهایم را شمیدی؟
تمام گریه‌ها بیهودگی بود،
همان یک قطرة اشکی، چکیدی.
پُرم از تو ، نمی‌بینم کسی را،
یقین دارم، که تو در من پدیدی!!

Гумон дорам, ки ту дар ман падидӣ ,
Магар ҳамчун мане дигар надидӣ?!
Садоямро миёни пардаҳое,
Шунидӣ , оқибат, оре шунидӣ.
Ба имдоди мани раҳрезу саргум,
Хушо охир ба имдоде расидӣ.
Аз ин гулзори рангоранги бедар,
Гули имони моро нек чидӣ.
Чи бераҳмӣ, ки ман аз ту буридам ,
Ту ҳам аз ман ба осонӣ буридӣ.
Мани бе ту надидам рузгоре,
Раҳимо, бар шаби мо кай дамидӣ?
Аз ин бозори колои хиёнат,
Харидӣ ҳастии моро, харидӣ.
Задӣ оташ ба пироҳан зи ғайрат,
Фикандӣ,пора кардӣ бардаридӣ.
Сарам дар саҷдаи шукронаи туст,
Ту атри тавбаҳоямро шамидӣ?
Тамоми гиряҳо беҳудагӣ буд,
Ҳамон як қатраи ашкӣ,чакидӣ.
Пурам аз ту , намебинам касеро,
Яқин дорам, ки ту дар ман падидӣ !!
Алма-Ата 2019ش.ر