Сино расид бар сарам, дардам даво нашуд, – Лоик Шерали

Сино расид бар сарам, дардам даво нашуд,
Дар коми гӯр рафтаму комам раво нашуд.
Бо бенаво навон шудам то бахшамаш наво,
Рӯзе, ки ман навон шудам, як ҳамнаво нашуд.
Бунёди осиёб агар будаст осу об,
Гардон зи оби чашми ман як осиё нашуд.
Эй ёр, ёри гумшуда дар дашти иштибоҳ
Будем мо ду чашмаю дарё чаро нашуд?
Гуфтам, ки дарди ишқро қисмат ҳамекунем,
Будем розӣ мову ту, қисмат ризо нашуд.
Ҳар тир, ки ба ман заданд, аз ман хато биҷаст,
Аммо амони ҷонам аз тири қазо нашуд.
Бидруд, ёри бовафо, умрам вафо накард,
Савганд хурда будаму аз ман вафо нашуд.
7.01.1997
Share:

Leave a Reply

Your email address will not be published. Required fields are marked *