صدیق کاوون
چې په سره مخ د ژوندون له پولې واوښت
د تاریخ غېږې ته لاړه ابدي شو
د ځوانۍ ګل یې د لمر پښو ته کېښود
د وطن په معرکه کې قرباني شو
مردي څه ده ؟ په سرو وینو کې لمبل دي
ځان له خپلې عقیدې قربانول دي
د غیرت په ورځ سکروټو ته دانګل دي
د دښمن په مخ کې جګ سر ودرېدل دي
له سینې یې وینو ووهلې دارې
سور اتل شو د رزمونو د سرې لارې
سر یې کېښوده د وینو په بستر کې
قرباني شو د وطن له سترې چارې
د ژوندون له کرښې واوښت جاودان شو
سر یې جار کړ له وطنه ، قهرمان شو
حماسه یې د خپل زړه په وینو لیک کړه
د رزمونو په ډګر کې پهلوان شو
عبدالرحمن پژواک
