بساطِ عجز میں تھا ایک دل یک قطره خوں وه بھی

بساطِ عجز میں تھا ایک دل یک قطره خوں وه بھی
بساطِ عجز میں تھا ایک دل یک قطره خوں وه بھی
سو رہتا ہے بہ اندازِ چکیدن سر نگوں وه بھی
رہے اس شوخ سے آزرده ہم چندے تکلّف سے
تکلّف بر طرف، تھا ایک اندازِ جنوں وه بھی
خیالِ مرگ کب تسکیں دلِ آزرده کو بخشے
مرے دامِ تمنّا میں ہے اک صیدِ زبوں وه بھی
نہ کرتا کاش نالہ مجھ کو کیا معلوم تھا ہمدم
کہ ہوگا باعثِ افزائشِ دردِ دروں وه بھی
نہ اتنا بُرّشِ تیغِ جفا پر ناز فرماو
مرے دریائے بیتابی میں ہے اک موجِ خوں وه بھی
مئے عشرت کی خواہش ساقیِ گردوں سے کیا کیجے
لیے بیٹھا ہے اک دو چار جامِ واژگوں وه بھی
مجھے معلوم ہے جو تو نے میرے حق میں سوچا ہے
کہیں ہو جائے جلد اے گردشِ گردونِ دوں، وه بھی!
نظر راحت پہ میری کر نہ وعده شب کو آنے کا
کہ میری خواب بندی کے لیے ہوگا فسوں وه بھی
مرے دل میں ہے غالبؔ شوقِ وصل و شکوہ ہجراں
خدا وه دن کرے جو اس سے میں یہ بھی کہوں، وه بھی