حق نا منگیں یار فقیرا

حق نا منگیں یار فقیرا
دتا جائیں گا مار فقیرا
روز نکلنا کٹڑی وچوں
پا کے غم دا ہار فقیرا
پل دو پل دی خبر نہ کائی
آکھن نوں دن چار فقیرا
سانوں دکھ نا دسن دیون
ٹی وی تے اخبار فقیرا
سب توں ودھ منافع بخشے
موت دا کاروبار فقیرا
چور لٹیرے باعزت نیں
توں ماڑا لاچار فقیرا
حق مارن حق دیون والے
منصف کرن شکار فقیرا
ہن تاں قبر وی پیسیاں باجھوں
ہوندی نئیں تیار فقیرا
تیرا وس بس اتھوں تیک اے
رو لے زار و زار فقیرا
سرمایہ کاری دے جرم دا
رج کے کر انکار فقیرا
لوکو اصلی دشمن ساڈا
ہے سرمایہ دار فقیرا
قرضے ، سود ، کمیشن ، قبضے
دو دھاری تلوار فقیرا
جاگ تے لڑ چالاکی دے نل
ہو وی بیڑا پار فقیرا
جاہل ،ظالم ، کاذب ، قاتل
ملاں بدکردار فقیرا
سانوں ایہنیں کجھ نئیں دینا
جھوٹی اے سرکار فقیرا
سانوں پہلے دن توں ہویا
فرحت شاہ نل پیار فقیرا
فرحت عباس شاہ