زبان گنگ اور

غزل
زبان گنگ اور آنکھوں سے کچھ بیاں نہ ہوا
وہ حال تھا کہ کبھی حالِ دل عیاں نہ ہوا
نہ ہو سکا کبھی شاداب میرا نخلِ وحود
ترے بغیر منوّر دیارِ جاں نہ ہوا
مجھے تلاش ہے ایسے کسی سخنور کی
تمھارے سامنے آکر جو بے زباں نہ ہوا
مجھے یقین دلایا کسی کی آنکھوں نے
فنا ہوا جو محبت میں رائگاں نہ ہوا
مجھے تھا رہنا سدا اپنی بات پر قائم
میں سنگِ میل ہوا گردِ کارواں نہ ہوا
بڑھے گی تیرگی نفرت کی ہر طرف راغبؔ
اگر چراغ محبت کا ضو فشاں نہ ہوا
شاعر: افتخار راغبؔ
کتاب: یعنی تُو