حقیقت خیز تہمت ہے جوانی
اِک آلودہ طہارت ہے جوانی
کبھی ہر لمحہ راحت ہے جوانی
کبھی ہر دم مصیبت ہے جوانی
سوادِ نقطہِ آلام ہو کر
محیطِ عیش و عشرت ہے جوانی
بقولِ بعض یارانِ جواں سال
گناہوں کی شریعت ہے جوانی
بصد ناپاکیِ احساس و افکار
بیانِ حسنِ نیت ہے جوانی
کبھی خود اپنے حق میں سمِ قاتل
کبھی داروئے ملت ہے جوانی
کبھی ہر اک نفس مصروف و مشغول
کبھی فرصت ہی فرصت ہے جوانی
نہ جانے کیوں، نہ جانے کس بنا پر
اک احساسِ ندامت ہے جوانی
جون ایلیا