وہ سر بام کب نہیں آتا

بہر تسکیں وہ کب نہیں آتا
اعتبار آہ اب نہیں آتا

چپ ہے شکوؤں کی ایک بند کتاب
اس سے کہنے کا ڈھب نہیں آتا

ان کے آگے بھی دل کو چین نہیں
بے ادب کو ادب نہیں آتا

زخم سے کم نہیں ہے اس کی ہنسی
جس کو رونا بھی اب نہیں آتا

منہ کو آ جاتا ہے جگر غم سے
اور گلہ تا بہ لب نہیں آتا

بھولی باتوں پہ تیری دل کو یقیں
پہلے آتا تھا اب نہیں آتا

دکھ وہ دیتا ہے اس پہ ہے یہ حال
لینے جاتا ہوں جب نہیں آتا

آرزو بے اثر محبت چھوڑ
کیوں کرے کام جب نہیں آتا

آرزو لکھنوی