دل کو آزار لگا وہ کہ چھپا بھی نہ سکوں

مدعا سامنے ان کے نہیں آتا لب تک
بات بھی کیا غم دل ہے کہ سنا بھی نہ سکوں

بے جگہ آنکھ لڑی دیکھیے کیا ہوتا ہے
آپ جا بھی نہ سکوں ان کو بلا بھی نہ سکوں

وہ دم نزع مرے بہر عیادت آئے
حال کب پوچھتے ہیں جب کہ سنا بھی نہ سکوں

زندگی بھی شب ہجراں ہے کہ کٹتی ہی نہیں
موت ہے کیا ترا آنا کہ بلا بھی نہ سکوں

دم ہے آنکھوں میں اسے جان میں لاؤں کیونکر
کب وہ آئے کہ انہیں ہاتھ لگا بھی نہ سکوں

شرم عصیاں نے جھکایا مری گردن کو ظہیر
بوجھ وہ آ کے پڑا ہے کہ اٹھا بھی نہ سکوں

ظہیر دہلوی