پرتوِ تنویرِ سحر

پرتوِ تنویرِ سحر
(23ویں مارچ 1957 یوم جمہوریہ پر)
ناطقہ آج کہیں سر بگریباں تو ہوا
نئے حالات کی توجیہہ کا ساماں تو ہوا
لفظ جمہور بہ پیرایہِ یک نقش جمیل
لوح دیوان تمدن پہ فروزاں تو ہوا
سایہِ پیکرِ رقاصہِ تدبیر و نظر
بزم تہذیب کی دیوار پہ رقصاں تو ہرا
تیرہ و تار نگاہوں میں سلگتا ہوا خواب
آج تعبیر کے مطلع پہ نمایاں تو ہوا
سینکڑوں سال کی مکروہ سیاست کا چلن
اپنے پیراہن شفاف میں عریاں تو ہوا
گو فضاؤں میں بھی کچھ دام بچھے ہیں لیکن
طاہر شوق فضاؤں میں پر افشاں تو ہوا
یہ بجا ہے کہ ابھی دور ہے منزل لیکن
قافلہ جادہ منزل میں خراماں تو ہوا
سخت ناپید تھے اسباب پریشانی دل
دل کسی خاص تصر سے پریشاں تو ہوا
اپنی تاریخ کے اوراق میں بار اول
نئے ابواب کی تدوین کا ساماں تو ہوا
تیرے اعزاز میں اے شام نشاط فردا
آج محراب تصور پہ چراغاں تو ہوا
اٹھتے اٹھتے یہ حجابات بھی اٹھ جائیں گے
کوئی در پردہ دل، سلسلہ جنباں تو ہوا
گو فسردہ ہی سہی روح گلستاں پھر بھی
ایک ہنگامہ، بہ عنوان بہاراں تو ہوا
گو ابھی تفرقہِ دیر و حرم باقی ہے
پھر بھی اس ضمن میں اک کار نمایاں تو ہوا
اب بھی موجود ہے سرمایہ و محنت کا تضاد
ہاں مگر شیوہِ تاویلِ پریشاں تو ہوا
یہ سحر ایک خبر ہے تو خبر کیا کم ہے
دوستو! پرتوِ تنویر سحر کیا کم ہے
جون ایلیا