ایک دوجے سے یہی پوچھ رہے ہیں ہم تم

ایک دوجے سے یہی پوچھ رہے ہیں ہم تم
ہم یہ کس راہ تک آ پہنچے ہیں
تھوڑا چلتے ہیں تو لوٹ آتی ہے
موڑ مڑتے ہیں تو دیوار نظر آتی ہے
تم مِلے
اور یہاں دیر کے بعد
روح کی اجڑی ہوئی بستی میں دروازہ کھلا
ایک جھونکا بھی۔۔۔۔ بہت دور سے آتا ہوا محسوس ہوا
ایک پتھر کہ جسے چاند کے پچھتاوے میں
دل نے ہر درد کی پیشانی پہ دھر رکھا تھا
یوں لگا جیسے ذرا کھسکا ہو
یوں لگا، ایسے لگا، ویسے لگا۔۔۔۔
کچھ نہیں، کچھ بھی نہیں، پاگل پن
سب کا سب مسلی ہوئی روح کا پاگل پن ہے
ورنہ سچ اتنا ہے بس
اپنی پتھرائی ہوئی آنکھوں سے گرتے ہوئے اشکوں کے کناروں پہ کھڑے ہم
اور تم۔۔۔۔۔۔۔۔۔۔ہم اور تم
تم مجھے دیکھ کے پوچھو۔۔۔۔ ہنس دو۔۔۔۔ کوئی ویران ہنسی سی
ہنس دو
میں تجھے دیکھ کے پوچھوں۔۔۔۔ رو دوں۔۔۔۔ کوئی لاچار سا
رونا۔۔۔۔۔۔۔رو دوں
تھوڑا چلتی ہے تو لوٹ آتی ہے
موڑ مڑتے ہیں تو دیوار نظر آتی ہے
ہم یہ کس راہ تک آ پہنچے ہیں
فرحت عباس شاہ