Мутрибо Асрори Моро Бозгӯ – Мавлоно Ҷалолуддини Балхӣ

Мутрибо, асрори моро бозгӯ,
Қиссаҳои ҷонфазоро бозгӯ!
Мо даҳон барбастаем имрӯз аз ӯ,
Ту ҳадиси дилкушоро бозгӯ!
Ман гаронгӯшам, биниҳ рух бар рухам,
Ваъдаи он хушлиқоро бозгӯ!
Моҷарое рафт ҷонро дар аласт,
Бозгӯ он моҷароро, бозгӯ!
Махзани инно фатаҳно баркушо,
Сирри ҷони Мустафоро бозгӯ!
Мустаҷоб омад дуъойи ошиқон,
Ай дуъогӯ, он дуъоро бозгӯ!
Чун Салоҳуддин салоҳи ҷони мост,
Он салоҳи ҷонҳоро бозгӯ!